انتو وفيتوا الندر؟؟؟

[ناني]

كل سنه وانتو طيبين بمناسبه عيد الشهيد العظيم امير الشهداء البطل ماري جرجس
(ava22)
وبهذه المناسبه هااقولكم معجزه لماري جرجس بس الاول هااقولكم نبذه صغيره عن المكان اللي حصلت فيه المعجزه وهو دير ماري جرجس بالمحروسه بمحافظه قنا :
(1) يوجد الدير بقريه المحروسه بمحافظه قنا بصعيد مصر
(2) يرجع بناء الدير الي عصر الملك قسطنطين والملكه هيلانه والدته
(3) بني الديرعلي النظام البيزنطي القديم الذي يعتمد علي شكل القباب
(4) بدا التعمير في الدير في عهد المتنيح الانبا مكاريوس وشهد اهتماما كبيرا في عهد نيافه الانبا شاروبيم ادام الله حياته
(5) يوجد بالدير رفات الشهيد ماري جرجس الروماني والشهيد ماري جرجس السكندري والشهيد ماري جرجس المزاحم
(6) في 7هاتور ( شهر نوفمبر ) من كل عام تحتفل الكنيسه بتذكار تكريس كنيسته

والآن مع المعجزه

[ناني]

المعجزه دي حصلت مع شخص من القاهره متزوج من خمس سنوات وربنا لم يعطيه نسل وكان له اقارب من قنا فراح هو وزوجته لزيارتهم وكان موافق موسم الاحتفالات بعيد الشهيد العظيم ماري جرجس في ديره اللي ذكرناه بالمحروسه فذهبوا كلهم للدير لنوال البركه ، وهناك كاهن الدير قال للزوجه السنه الجايه هاتيجي ومعاكي عجلين ، راح زوجها قاله احنا هاندبح عجلين؟؟!! ابونا قاله لأ عجل هاتعمدوه والثاني هاتدبحوه.
ورجعوا الرجل وزوجته تاني للقاهره ولم تمر سنه حتي تم الحمل وربنا اداهم توأم ولد وبنت ، لكن لبعد المسافه بين القاهره وقنا لم يذهبوا للدير ليوفوا الندر وكبر الولد والبنت وبقي سنهم 3 سنوات وفجأه مرضت البنت مرض شديد لدرجه انها لم تستطع ان تحرك ايديها ولا رجليها وبعدين ...دخلت في غيبوبه ........ والدكتور قال ان عندها فيروس في النخاع الشوكي ....ودي حاله صعبه جدا فاما انها .... تموت ......او اذا فاقت من الغيبوبه ستصاب باعاقه مستديمه ..........ونقلوها للمستشفي
وهناك كان معاها في الأوضه 4 حالاتتاني غيرها مصابين بنفس المرض وفي حاله غيبوبه زيها ، وبعد اليوم الاول ليها في المستشفي ....مات اول طفل من الاربعه ..........وبعد اليوم التاني مات الطفل التاني ..........وهكذا ..بعد مرور اربعه ايامكان مفيش في الاوضه غير البنت دي(وطبعا عارفين شعور مامتها كان ازاي وهي حاسه ان ممكن يكون الدور علي بنتها ) وكان كل اللي حواليها بيصلوا بدموع ان ربنا يشفيها وبعدين راح جد البنت اتصل باقاربهم في قنا واخدوا تليفون الدير واتصلوا بالدير وجدها قال لكاهن الدير : شوف يا ابونا احنا اخدنا الولد والبنت من عندكوا من ايد ماري جرجس فاطلب لنا شفاعته علشان البنت تشفي فكاهن الدير قاله هو انتوا وفيتوا الندر ؟؟ راح جدها قاله يابونا احنا ف ايه ولا ف ايه !!! اقولك البنت بتموت تقولي الندر !!! طيب صليلها تشفي الاول وبعدين نشوف حكايه الندر ، فأبونا قاله :
ماهو انتوا لو ماجيتوش الدير ووفيتوا الندر البنت مش هاتخف ..... وفعلا راحوا اشتروا العجل وذهبوا به للدير ووفوا الندر .........
ولم يمر اسبوع حتي كانت حاله البنت اتحسنت تدريجيا والدكتور كتب لها علي خروج من المستشفي وقالهم ان دي معجزه انها تعيش وتتحسن بالسرعه دي وانتوا شفتوا الاطفال اللي كانوا معاها ....، وعلي العموم هي هاتقضي علي الاقل سنه في العلاج الطبيعي علشان تبدأ ترجع لحالتها الطبيعيه .......ولكن، لم تمر اربعه اشهر وكانت البنت رجعت لحالتها الطبيعيه ببركه شفاعه وصلوات البطل الشهيد ماري جرجس .
شفاعته تكون معنا آآآمين

[BeshoY]

قصة فوق الروعة بركة الشهيد العظيم مارجرجس تكون معنا

شكراا ليكى يا نانى ربنا يعوضك

[ناني]

ميرسي ليك يا بيشو ربنا يباركك
اذكرني في صلاتك

[بنت الانبا تكلا]

اشكرك ناني على المعجزة ربنا يعوضك

[medhat atef]

بجد قصة جميلة جدااااااااااااااااا

شفاعة الشهيد مارجرجس تكون معانا

ربنا يبارك خدمتك

[ناني]

ميرسي بنت الانبا تكلا ومدحت علي مروركم الجميل
ربنا يبارك حياتكم

[hurican]

معجزه حلوه اوي اوي اوي الواحد بيحس ان ربنا معاه دي حاجه عظيمه
بركة شفاعة صلوات القديس العظيم مارجرجس تكون مع جميعنا امين

[yoyo2008]

بركة مارجرجس الشهيد تكون معانا وشكرا يا اختى نانى على المعحزة الحلوة جدا وربنا يبارك فى خدمتك

[ناني]

ميرسي علي مروركم الجميل ربنا يحميكو