ارشادات وزاره الداخليه للاخوه الاقباط قبل الخروج من المنزل

عزيزى المواطن المسيحى المصرى : اذا شعرت برغبه مُلحه فى الخروج من منزلك للذهاب الى عملك او الى الكنيسه او الى ماغير ذلك, فنرجوا منك اتباع الخمس خطوات التاليه ,وذلك حرصا من وزارة الداخليه فى التعرف على هويتك عند حدوث اى حادث مفاجىء متوقع مُنظم ومُرتب له مسبقا .واليك الخطوات :-

1-قم بكتابة ارقام متسلسله على جميع اعضاء جسمك بدءا من الرأس وحتى اصابع القدمين مرورا بما بينهم من الصدر والبطن و اللامؤاخذه ال .... و ال ....... حتى يسهُل جمعها وتجميع اشلائك بعد التفجير, ويرجى الكتابه بخط كبير وواضح.

ولاتنسى التوقيع بالاسم الرباعى اسفل كل رقم


ملحوظه : إذا كنت ترغب فى الترقيم باللغه الانجليزيه ,فيجب عليك ان تبدأ بترقيم الاطراف اليُسرى أولا ثم الاتجاه بالاطراف اليُمنى

تفضل الكتابه والتوقيع بأى لون غامق وواضح ماعدا اللون الاحمر حتى يسهل تمييزه عن لون دمك اللى هايسيح بعد ماتتقتل او تتفجر, عشان ماتتعبناش يا حبيبى.. وإذا كنت تنوى الخروج ليلا فُيرجى منك ان تكون الكتابه بقلم فسفورى وذلك حتى تُسهل عملية جمع الاشلاء ,كما ايضا لكى تكون هدفا سهلا للقاتل ..تمشى تلعلع وتبرُق عشان يعرف يصطادك


2-حاول ان تستبدل بطاقة الرقم القومى البلاستيكيه ببطاقة ستانلس ستيل او الوميتال او اى معدن مقاوم لدرجات الحراره العاليه حتى يسهُل التعرف على هويتك بعد الانفجار او القتل ..لان البطاقات البلاستيك هاتسيح فى النار

3- حاول ان تُبقى ملامح وجهك مبتسمه دائما وانت تسير فى الطريق ,حنى متى جاءت ساعة القتل او الانفجار تُقتل وانت مبتسم عشان صورتك اللى هاتتاخد فى المشرحه وتظهر على الجرايد تكون حلوه وواضحه,وكمان عشان يظهر للجميع انك مقتول برغبتك وانت فى غاية السعاده

4- ضع فى جيوب ملابسك اقرار مكتوب فيه بأن من قتلك او فجرّك هو عميل للموساد او شخص معتوه او رجل شرطه مختل عقليا وعنده ظروف نفسيه صعبه...ومن فضلك لاتنسى التوقيع اسفل الاقرار ويكون الاقرار مُوقع من عدد اتنين موظفين احدهما مسلم والاخر مسيحى (ده ان لقيت حد مسيحى عايش اساسا عشان يمضيلك)..والهدف من ذلك هو ترسيخ مبدأ المواطنه والتأكيد على الوحده الوطنيه بين عنصرى الأمه..وعشان ماحدش يتللك ويقول المسيحين عاوزين يولعوها ..احنا بنعمل كده لمصلحتك


ملحوظه: يُرجى ان يكون الاقرار مكتوبا على لوح معدنى من نفس معدن بطاقتك( انظر البند رقم 2)..ويكون الخط واضحا مع كتابة الرقم القومى للشهود اسفل التوقيع


5- حاول ان تحتفظ بعدد 4 صور شخصيه أو اكثر ..برضو تكون محفوره بالليزر على لوح معدنى من نفس نوع لوح البطاقه والاقرار (ادينى بكرر تانى اهو عشان ماحدش يقول ماسمعتش وماشوفتش)


طبعا واحد هايقولى : اشمعنى 4 صور ؟؟ والاجابه بسيطه


صوره تتحط فى الجرايد لو وشك اتشوه فى الانفجار او لو الرصاص بوّظ ملامح وشك


وصوره تاخدها الداخليه تحطها فى الملف بتاعك


وصوره لوزارة الصحه عشان تصريح الدفن


وصوره تنزل على كارت الاربعين بتاعك


وخلى صوره احتياطى فى البيت عشان ابوك وامك واهلك يبروّزوها ويحطوا عليها شريطه سوده







هذا وتُهيب وزارة الداخليه بالساده المواطنين وتؤكد بان اى حدث سوف يحدث فى كنيسه لأى مسيحى فى أى حته فى مصر ,هو حدث مفاجىء وليس به اى شُبهه جنائيه تماما وأن مُرتكبه هو اما شخص مختل عقليا او عميل اسرائيلى ..وأن اى حادث حرق فى كنيسه هو ماس كهربى

والرجاء من الساده المواطنين ضرورة اتخاذ اللازم وحجز قاعات العزاء فى الكنائس واستخراج شهادات الوفاه مقدما وشراء صناديق الدفن والأكفان وخليهم احتياطى مش هايخسّروا



وشكرا لحسن تعاونكم معنا

ههههههههههههههههههههههههه
بجد جاااااامدة جدااااااااااااا
شعار الشرطة في خدمة الشعب مكنش من فراغ

ربنا يباركك

حاجه تضحك
حلو خالص
هههههههههههههههههههههههههههههه

شكرا على مروركم الجميل
والداخليه بتعمل اللى عليها اهو
عشان محدش يلوم عليها بعد كده
ههههههههههههههه