يبقى انت أكيد فى مصر

الشعب المصرى .. مهموم بالأحداث .. أو غافل عنها ... الشعب المصرى
البلطجية كانوا " مبرطعين " فى الإنتخابات , مين إداهم الفرصة دى وفين الأمن لحماية الناخبين .!؟ "محاسب قانونى "

مش توزيع فلوس على الناس لشراء الأصوات جريمة يعاقب عليها القانون !؟ "عضو حقوق انسان"
الجولة الأولى شوف ضحيتها كام واحد والنهارده ربنا يستر من ضحايا الشعب برلمان ... قال صوت الشعب قال ... وهم بيموتوا الناس عشان يفوزوا . "موظف"
بصراحة معرفتش إن استخراج البطاقة الإنتخابية قبل الإنتخابات بـ3 شهور ... المفروض يوعونا بحاجة زى كده . " سيدة من القاهرة "
كانوا بيتكلموا دايما فى البرامج عن العنف فى المجتمع اللى زاد فى الفترة الأخيرة ... أظن بعض المرشحين ضربوا مثلا يحتذى به فى العنف والوصول للحصانة . "مدير مدرسة ثانوى "
لو مش عاملة بطاقة تموين إزاى هاخد أنبوبة بوتاجاز مدعمة ولا هشترى ليا أنبوبتين أو تلاتة فى الشهر بـ100 جنيه . "موظفة "
هو السكر غلى ليه !!!؟ " ربة منزل "
بقالنا 6 شهور فاتورة الكهربا ماجاتش قالولنا " انتوا وقعتوا من الكمبيوتر " يارب نقع دايما . "مواطن من المنوفية "
هو فعلا اللى مش هايروح المدرسة هايتحرم من دخول الإمتحانات ؟! "طالبة ثانوية عامة"
المدراس من اول شهر مافيهاش شرح ومحدش من المدرسين بيدخل الفصول .. يبقى نروح المدرسة ليه !؟ "طالب ثانوية عامة بالقليوبية"
لما احنا واثقين من نفسنا رفضنا المراقبة الدولية على انتخاباتنا ليه !؟ " طبيب"
لازم يكون فيه بحث وتحرى عن المرشحين اللى بيستعينوا ببلطجية ويستخدموا اسلحة مختلفة ويتم محاكمتهم . أنا مش عارف ده ما بيتنفذش ليه ؟! "شاب ليسانس حقوق "

شكرا Misho Fayez ربنا يبارك فى خدمتك وربنا موجود