أفراح و أحزان ليلة راس السنه

الفرحه في لحظه اتحولت لأحزان
مش قادر اصدق ازاي ده حصل و كان
و ازاي الي عملها جالو قلب يعمل كده فينا
يعمل مدبحه و يفسد فرحة العيد علينا
بس رغم ان قلوبنا عالارض فيها احزان
الا ان السما فيها فرحه باحلى الالحان
و رغم البكاء و الصراخ و العويل
الا ان الي حزنانين عليهم حاسين بفرحه ملهاش مثيل
و كأن الاجراس مكانتش بتدق للسنه الجديده
أكنها بتدق لفرحة زفه مجيده
زفه على ابواب أورشليم الي فوقينا
زفة شباب شافوا السما قبلينا
زفة ترحيب شديدة الجمال
زفه دخول مكان فوق الخيال
احنا عالارض حزانا لكن السما فوقنا فرحانه
بناس سكنوا مع ربنا الي دايما واقف معانا
فرحانين معاه بملكوت السموات
الي مفيهوش أي الام أو آهات
بس متنسوش تذكرونا قدام الفادي بصلواتكو
عشان احنا في أمس الحاجه لشفاعتكو
و اخيرا يارب برجوك انك تقف معانا
عشان نكون لأجلا إسمك متحملين أي اضطهاد أو إهانه