ياترى انت محتاح,لشئ..لشخص ما ؟هو يعنى احتياج؟ يطلع اية دة؟

يا شباب مين فينا مبيقولش انا محتاج للحاجة الفلانية او للحد الفلانى
الكلمة دى انا شخصيا بقولها اكتر ما بقول اى حاجة تانى ياريت نتشارك ونننتناقش سوا ف قضية بتلمسنا كلنا كشباب وشابات ونبنى بعض بارائنا

معنى الاحتياجات

يعني إيه احتياج؟

ايه الفرق بين إني أكون عايز حاجة وبين إني أكون محتاج حاجة؟

زي ما لينا احتياجات جسدية زي الميه والهوا و الأكل والنوم. كمان عندنا احتياجات نفسية. زي مثلاً الحب والقبول من الناس أو الشعور بالامان. وعندنا احتياج روحي أساسي هو الاحتياج لله . الاحتياج للأكل لازم نشبعه بشكل صحي ومتزن علشان جسمنا يبقى سليم، كمان الاحتياجات النفسية والروحية لازم نشبعها علشان شخصياتنا تبقى سليمة.

يعني إيه شخصياتنا؟

الشخصية هي الحاجات اللي بتميِز كل إنسان عن التاني. كلنا بنفكر لكن مش كل الناس بتفكر بطريقة واحدة. ممكن حاجة واحدة تحصل قدام اتنين. واحد يفهمها بطريقة وواحد تاني يفهمها بطريقة تانية، علشان كل واحد بيفكر بطريقة مختلفة عن التاني، و بيستقبل اللي بيحصل حواليه في الدنيا بطريقة مختلفة عن غيره. كلنا بنشعر تقريباً نفس المشاعر؛ الخوف والغضب والحزن والفرح. لكن بدرجات مختلفة من واحد للتاني وفي مواقف مختلفة.
يعني الشخصية هي طريقة الواحد في التفكير والشعور والسلوك. الشخصية فيها حتة بنتولد بيها ما نقدرش نغيرها وحتة تانية أكبر، بتتكون مع السنين من خلال اللي بنتعلمه و بنشوفه والعلاقات المهمة اللي في حياتنا والحاجات اللي بتحصل حوالينا.

إيه هي الاحتياجات النفسية دي وإزاي ناخدها؟

1) القبول من غير شروط. "الحنية"

إننا نكون مقبولين كبني آدمين من غير ما نعمل حاجة حلوة زيادة أو حتى لما نعمل حاجة غلط.

2) الأمان

إننا نحس إن الحياة والناس إللي حوالينا مش خطر قوي وما فيش حاجات جامدة بتهددنا. وكمان إننا نحس إن فيه حد ممكن يحمينا لما نتعرض لخطر. ده بيخلينا مطّمنين ومصدقين إننا ممكن نحمي نفسنا.

3) الإعجاب

إننا نعجب حد ويكون لينا تأثير كويس في الناس والحياة حوالينا والناس تعبر لنا عن التأثير ده

4) الاحترام

إن الناس تحترم حقوقنا واحتياجاتنا وما تتعداش عليها. إن ما حدش يشتمنا أو يتتريق علينا أو يمد إيده علينا بأي صورة مهينة بالضرب أو بغيره. كمان إن ما حدش يستغلنا علشان انبساطه.

5) التشجيع

إن حد يقف جنبنا ويمدحنا لما نعمل حاجة كويسة.

6) الاهتمام

إننا نكون مهمين عند حد. حد يفكر فينا ويهتم بمصلحتنا و يبذل مجهود علشان إحنا نكون مبسوطين وبخير.

7) المساندة

إن حد كبير بنحترمه يقف جنبنا، يسمعنا و يسندنا ولو طلبنا منه النصيحة ينصحنا. من حقنا نختار شخص أمين ومخلص يلعب الدور ده في حياتنا.

8) التعزية

إن حد يقف جنبنا لما نكون حزانى ويستحمل حزننا ومشاعرنا الملخبطة في الوقت ده.

9) دفء المشاعر

إن حد يحس بمشاعرنا ويعبر لنا عن حنانه بطرق سليمة ومحترمة.

10) التقدير

إن حد يقدر ويفهم إللي بنمر فيه ويبذل مجهود في إنه يعرف دنيتنا شكلها إيه وإزاي دنيتنا ممكن تكون مختلفة عن دنيته.



وحشتونى وكل سنة وانتو طيبين

سنفولبوي وحشتنا كتيرررررررر ومواضيعك الجميلة متغبش عننا تاني

حقيقي موضوع رااااائع جداااااااا ومفيش اي تعليق لان الموضوع كامل مش محتاج اني اضف اي تعليق

ربنا يعوض تعب محبتك

موضوووع جميييييل اووووي اوووي يا sinfulboy بجد

ميرسي لتعبك ومحبتك الجميلة......وكل سنة وانت طيب

موضوع راائع جدا وحقيقى ميرسى جدا سينفول بوى ربنا يبارك خدمتك الجميلة ويباركك وكل سنة وانت بخير

ميرسى كتير على تشجيكم وبجد وحشنى المنتدى كتير .. ربنا معاكم

ربنا يعوض تعب محبتك ومرسى جداااااااااااااااا

ربنا يعوض تعب محبتك ومرسى جدااااااااااااااااااا

ميرسى جداااsinfulboy للموضوع الجميل ربنا يعوض تعب محبتك

موضوع جميل
الرب يبارك خدمتك ويمنحك اجرا سمائيا